لەگەڵمانبە لە:

شاسوار عەبدولواحید دنیابینی بۆ جۆرێکى نوێى سیاسیەت هەیە

مارک حەبیب

شاسوار عەبدولواحید دنیابینی بۆ جۆرێکى نوێى سیاسیەت هەیە لەکوردستانى عێراق (بەڵکو لەڕاستیدا بۆ هەموو عێراق)، عەبدولواحید سەرۆکى جوڵانەوەى نەوەى نوێ  (NGM)ە، کە حزبێکى سیاسیى کوردییە لەهەولێرو، لە ١١١ کورسى پەرلەمانى کوردستان خاوەنى ٨ کورسییەو هەروەها چوار کورسیشى لەپەرلەمانى نیشتمانى هەیە لەبەغدا کە لە ٣٢٩ کورسی پێکدێت.

ئەم ژمارانە وا لە نەوەی نوێ  دەکات کە لایەنێکى پەراوێز بێت، بەڵام بەو پێیەى ماوەى تەنها ١٠ مانگە دامەزراوە، نمایشەکەى لەسەر سندوقەکانى دەنگدان خراپ نەبوو، لەوەش گرنگتر ئەوەیە کە ئەم حزبە ئەرکێک و سەکۆیەکى نایابى هەیە.

شاسوار عەبدولواحید سەردانى واشنتۆنى کرد بەمەبەستى کۆبوونەوە لەگەڵ بەرپرسانى وەزارەتى دەرەوەى ئەمریکاو قسەکردن لەپەیمانگاى رۆژهەڵاتى ناوەڕاست، ئەو سیاسیە کوردە تەمەن (٤٠) ساڵە دەڵێت "(پاسەوانە کۆنەکان) ماوەیەکى دوورو درێژە حوکمڕانى عێراق دەکەن و پێویستە ئیتر دەنگى نوێ ببیسترێت".

لەگەڵ ئەوەشدا دەڵێت "نەوەی نوێ تەنها قسە لەسەر گەنجان ناکات، بەڵکو لەسەر ئەو کەسانەش دەیکات کە دەرفەتیان نەخراوەتە بەردەم"، تەنانەت نەک تەنها بۆ کورد "بەڵکو بۆ هەموو عێراق".

ناوبرا هەڵوێست و دنیابینى نەوەی نوێ دەربارەى کەرکوک دەخاتەڕوو و دەڵێت "مەسەلەى کەرکوک گەورەترە بۆ سیاسیەکان لەبەغداو هەولێر لەچاو خەڵکى کەرکوکدا"، عەبدولواحید دەڵێت "نەوەی نوێ پێداگرى لەسەر پێکهێنانى حکومەتێکى خۆجێى دەکات کە نیگا بخاتە سەر خزمەتى خەڵک نەک وابەستەى حزبە گەورەکان بێت".

شاسوار عەبدولواحید دەڵێت "نەخشەڕێگاى کارى نیشتمانى نایەوێت پەیوەست بێت بە ئیئتلافى دەسەڵاتدارەوە"، ئەو دەڵێت "پێویستە ئۆپۆزسیۆنێکى پەرلەمانى هەبێت"، لەگەڵ ئەوەشدا ئەو ئاماژەى بەوەدا کە دژى چوونە هاوپەیمانێتى نییە لەگەڵ حزبە بچووکەکانى تردا کە ئامانجى هاوبەشیان هەیە.

سەرۆکى جوڵانەوەى نەوەى نوێ ئاماژەى بەوەدا کە لەهەڵبژاردنى پێشووى هەرێمى کوردستاندا، کەمتر لە ٤٠%ى دانیشتوان دەنگیان داوە، لەم رێژەیەش، رێژەى ٤٠%ى دەنگدەران دەنگیان بەحزبەکانى دەرەوەى دوو حزبە گەورە دەسەڵاتدارەکە (یەکێتیى نیشتمانى کوردستان و پارتى دیموکراتى کورستان)داوە، ئەنجامەکەش ئەوەیە کە لەگەڵ ئەوەى ئەو دوو حزبە هەژموونیان بەسەر هەرێمى کوردستان و حکومەتەکەیدا هەیە، بەڵام ئەوان لەلایەن تەنها ٢٥%ى دەنگدەرانەوە پشتگیرى کراون. شاسوار عەبدولواحید دەڵێت "زۆرینەى کوردەکان پشتگیرى لە یەکێتى نیشتمانى کوردستان و پارتى دیموکراتى کوردستان ناکەن".

بەرنامەى کارى نیشتمانى پشت دەبەستێت بە مەبدەئەکانى لیبراڵیەتى دیموکراتى و ئابوورى کلاسیک و دەسەڵاتێکى دادوەریى سەربەخۆو بەهێز (کە بەبڕواى شاسوار عەبدولواحید تاکە رێگەی بەرەنگاربوونەوەى گەندەڵیە)یە، هەروەها پشتگیرى کەرتى و تایبەت بەتایبەتى کۆمپانیا بچووکەکان، هەروەک ئەو سیاسەتانەى کە وەبەرهێنانى دەرەکى رادەکێشێتە ناو وڵات.    

نەوەی نوێ بەشێوەیەکى بەهێز پشتگیرى لەمافەکانى ژنان دەکات، شاسوار عەبدولواحید دەڵێت "پێویستە ژنان خاوەنى ئابوورى سەربەخۆ بن، بەبێ سەربەخۆیى ئابوورى، سەربەخۆیى خودیى بوونى نابێت". هەروەک نەوەی نوێ پشتگیرى لە باشترکردنى فێرکردنى ژنان و پشتگیرى کردنى ئەو کۆمپانیایانە دەکات کە ژنان خاوەنین.

ساڵى ٢٠١٧ شاسوار عەبدولواحید سەرکردایەتى هەڵمەتى (نەخێر لەئێستادا)ى کرد، کە داواى دواخستنى راپرسیى لەسەر سەربەخۆیى کوردستان دەکرد، ئەمە وێڕاى سەرکردایەتى کردنى رێبازى سیاسیى گشتیى حزبەکەى، وا دەردەکەوێت کە شاسوار عەبدولواحیدو حزبەکەى خەونى بینینى رۆڵێکى گەورەتریان هەیە لەسەر گۆڕەپانى عێراق، نەک تەنها لەناوخۆى هەرێمى کوردستاندا، ئەو دەڵێت ئامانجى بۆ حزبەکەى لەهەڵبژاردنەکانى ٢٠٢٢دا (٤٤) کورسى پەرلەمانى عێراق و (٨٨) کورسى پەرلەمانى کوردستانە.

سەرەڕاى چالاکیى سیاسیى، شاسوار عەبدولواحید دامەزرێنەرى دامەزراوەى میدیایى نالیایە، کە کۆمپانیایەکى راگەیاندنى بێلایەنەو کوردنیوزو چەندین دەروازەى ترى پەخش لەخۆدەگرێت، شاسوار عەبدولواحید دەڵێت "سەکۆیەکە بۆ هەموو دەنگەکان". نالیا ئۆفیسى لەهەریەکە لە (واشنتۆن و بەغدا)و چەندین پایتەختى ئەوروپیدا هەیە.

شاسوار عەبدولواحید جەخت دەکاتەوە کە ئازادیى راگەیاندن تائێستا لەهەرێمى کوردستان بەتایبەت و لەعێراقدا بەگشتی لەبەردەم تەحەدادایە، ئەو دەڵێت "من بوومە ئامانجى هەوڵێکى تیرۆر کردن"، هەروەها دەڵێت "ساڵى ٢٠١١ کەناڵە تەلەفزیۆنیەکەم بووە ئامانجى هێرشێکى بەئەنقسەت پاش ماوەیەکى زۆر کەم لە کردنەوەى" سەرۆکى جوڵانەوەى نەوەى نوێ دەڵێ "راگەیاندنى سەربەخۆ کاریگەرییەکى ئەوتۆى نییە کە باس بکرێت لەهەرێمى کوردستاندا، چونکە ئەو دوو حزبە هەموو شتێکیان کۆنترۆڵ کردووە.

لەگەڵ ئەوەشدا شاسوار عەبدولواحید دەڵێت "بارودۆخەکە مایەى بێ ئومێدى نییە"، ئەو هەوڵى بونیادنانى پشتگیرییەکى نێودەوڵەتى دەدات و دەڵێت "بەبێ راگەیاندنى ئازاد لەعێراقدا، ئارامى لەعێراقدا بوونى نابێت".

ئەم وتارە لە ماڵپەڕی "The Arab Weekly"دا بە زمانی ئینگلیزی بڵاوکراوەتەوە.
308 ‌خوێندراوە‌
11/18/2018 5:33:13 PM

زۆرترین خوێندراو