لەگەڵمانبە لە:

هەواڵ

پارتى سەردانى نەوەى نوێ دەکات و داوا دەکات بە یەکلیستى لەگەڵ هێزەکانى تر بەشدارى هەڵبژاردنى ئەنجومەنى پارێزگاکان بکات

9/22/2019 3:31:24 PM

  • بابەتى یەک لیستى هێزە کوردییەکان بۆ هەڵبژاردنى ئەنجومەنى پارێزگاى کەرکوک و ناوچەکانى دەرەوەى ئیدارەى هەرێمى کوردستان، جموجۆڵ و سەردانى لایەنەکانى بۆ لاى یەکتر و بەتایبەتیش بۆ لاى جوڵانەوەى نەوەى نوێ گەرم و گوڕ کردووە.

    لەماوەى یەک هەفتەدا، شاندێکى یەکێتى لەسلێمانى و شاندێکى پارتیش لەهەولێر سەردانى جوڵانەوەى نەوەى نوێیان کردو داوایان لەجوڵانەوەکە کرد کە بەیەک لیست لەگەڵیاندا بەشدارى هەڵبژاردنەکانى کەرکوک بکات، بەڵام دوێنێ جوڵانەوەکە رایگەیاند کە هێشتا بڕیاریان لەو بارەیەوە نەداوە.
    لەشارى هەولێر شاندێکى پارتى بەسەرۆکایەتى کاکەمین نەجار ئەندامى ئەنجومەنى سەرکردایەتى پارێزگاى هەولێرى ئەو حزبەو خەسرەو گۆران بەرپرسى مەکتەبى هەڵبژاردنى پارتى، سەردانى ئۆفیسى هەولێرى جوڵانەوەى نەوەى نوێیان کرد.
    جوڵانەوەى نەوەى نوێ، وێڕاى ئەو دەستپێشخەریانەى بۆیکراوە بۆ بەشداربوونى لەلیستى یەکگرتوو لەکەرکوک و ناوچەکانى ترى دەرەوەى ئیدارەى هەرێم، بەڵام تائێستا بڕیارى یەکلاکەرەوەى نەداوە بۆ بەشداریکردن یان نەکردن لەو لیستەداو بەرپرسانى جوڵانەوەکەش ئاماژە بەوە دەکەن کە دیراسەى بابەتەکە دەکەن.
    سەردانەکەى شاندى پارتى بۆ ئۆفیسى هەولێرى جوڵانەوەى نەوەى نوێ، پاش چەند رۆژێک لە سەردانى شاندێکى یەکێتى دێت کە بۆ هەمان مەبەست سەردانى ئۆفیسى سەرەکى نەوەى نوێیان کرد لەشارى سلێمانى، ئەمەش بەیەکەمین سەردانى هەردوو حزبى پارتى و یەکێتى دێت بۆ لاى جوڵانەوەى نەوەى نوێ وەک هێزێکى نوێ و ئۆپۆزسیۆن لەکوردستاندا.
    بڕیارە رۆژى شەممەش حزب و لایەنە سیاسییەکانى کوردستان لەسەر بابەتى یەک لیستى لەکەرکوک و ناوچەکانى دەرەوەى ئیدارەى هەرێم کۆبوونەوەیەک بکەن و جوڵانەوەى نەوەى نوێش لەو کۆبوونەوەیەدا بەشدار دەبێت، بەڵام بەوتەى بەرپرسانى جوڵانەوەکە بەشداریان لەو کۆبوونەوەیەدا بەماناى بەشداریان نایەت لەلیستێکى یەکگرتووداو بەڵکو ئەو بڕیارە دیراسە دەکەن.


زۆرترین خوێندراو