لەگەڵمانبە لە:

لێدوانی فەرمی

پێویستە پرۆژە یاساى چاکسازى لەخزمەت خەڵکى کەمدەرامەت و مامناوەند بێت

12/22/2019 10:25:53 PM

  • سەرلەبەیانى ئەمڕۆ ئەنجومەنى سیاسیى جوڵانەوەى نەوەى نوێ لەسەر کارو چالاکى ساڵى رابردوو و خۆ ئامادەکردن بۆ ساڵى داهاتوو دوایین کۆبوونەوەى سالی ٢٠١٩ ی گرێدا.

    لەکۆبوونەوەکەدا جەختکرایەوە کە پرۆژە یاساى چاکسازى لەکوردستان پێویستە بەجۆرێک بێت کە خزمەتى خەڵکانی کەمدەرامەت و مامناوەند و فەرمانبەرى ئاسایى بکات و پلە باڵاکانیش خانەنشینیان نەبن.
    هەر لەو کۆبوونەوەیەدا ئەنجومەنى سیاسیى دووپاتى کردەوە کە جوڵانەوەکەو ئەوەى نوێنەرایەتى جوڵانەوەکە دەکات لەئەنجومەنى نوێنەرانى عێراق ناچنە ئەو بەرەیەى کە پارتى و یەکێتى و هەندێک حزبى دیکە بەناوى فراکسیۆنە کوردیەکانەوە دروستیان کردووە، چونکە جوڵانەوەى نەوەى نوێ پێى وایە کە یەکێتى و پارتى لەهەر شوێنێک بن بەدواى بەرژەوەندییەکانى خۆیانەوەن نەک بەرژەوەندى خەڵک.
    لەکۆبوونەوەکەدا لەگەڵ فراکسیۆنى نەوەى نوێ لەپەرلەمانى کوردستان جەختکرایەوە لەوەى پەرلەمانتارانى نەوەى نوێ وەک هەمیشە لەناو خەڵکدا بن و نزیک بن لە کێشەکانى خەڵک و بەدواى داواکارییەکانیاندا بچن، بەتایبەت کێشەکانى خەڵک سەبارەت بەپرۆژە یاساى چاکسازى.
    ئەنجومەنى سیاسیى جوڵانەوەى نەوەى نوێ جارێکی تریش جەخت لەهەڵوێستى نەگۆڕى خۆى دەکاتەوە کە ئەنجامدانى هەڵبژاردنى پێشوەختە لەعێراق و هەرچى تایبەتە بەو یاساى هەڵبژاردنە کەلەئێستادا لەپەرلەمان گفتوگۆى لەسەر دەکرێت، جوڵانەوەى نەوەى نوێ لەگەڵ پێشنیازى 100%ى کاندیدى سەربەخۆو لیستى تاکدایە کە دوور بێت لەدەستى حزب و قۆرخکردنى کایەى سیاسیى لەلایەن حزبەوە کە بەجۆرێک بێت رێگە خۆشکەر بێت بۆ هێنانە پێشەوەى گەنجان و کەسانى سەربەخۆ لەسایەى دروستکردنى کۆمسیۆنێکى سەربەخۆى بێلایەن دوور لە دابەشکارى و پشک پشکێنەى حزبى.
    ئەنجومەنى سیاسیى
    جوڵانەوەى نەوەى نوێ
    21/12/2019