لەگەڵمانبە لە:

هەواڵ

سەرۆکی جوڵانەوەی نەوەی نوێ: پشتیوانی پێكهێنانی حكومەتی عێراق دەكەین

2/26/2020 10:45:25 PM

  • سەرۆکی جوڵانەوەی نەوەی نوێ رايگەیاند، پشتیوانی پێكهێنانی حكومەتی عێراق دەكەن كە نوێنەرایەتی داواكارییەكانی خەڵك بكات و دوور بێت لە كاندیدە حیزبییەكان بە حزبە كوردییەکانیشەوە. دەشڵێت، "دوو حزبی بنەماڵەی بارزانی و تاڵەبانی نوێنەرایەتی گەلی كورد ناكەن." شاسوار عەبدولواحید، سەرۆکى جوڵانەوەى نەوەى نوێ لە تویتێکیدا نوسیویەتى، "جوڵانەوەی نەوەی نوێ وەك بەشێك لە شەقامی كوردی کە نزیکەى لەسەدا ٦٥ى دەنگدەرانى بەشدارى هەڵبژاردنیان نەکرد، پشتیوانی پێكهێنانی حكومەتی عێراق دەكات، حكومەتێك كە نوێنەرایەتی داواكارییەكانی خەڵك بكات و دوور بێت لە كاندیدە حیزبیەكان بەو حزبە كوردییانەشەوە كە بە ساختەكاری خۆیان كردووە بە نوێنەری گەلی كورد و بڕیارەكانی كوردستانیان بە زەبری چەك و پارە و بانگەشەى نەتەوەیی قۆرخكردووە".

    ئاماژەى بەوەشکردووە، " دوو حزبی بنەماڵەی بارزانی و تاڵەبانی، نوێنەرایەتی گەلی كورد ناكەن، ئەوان سەرەڕای ئەو ساختەکارییە ئابڕووبەرەی كردیان لە هەڵبژاردنی رابردوودا، لە كۆی شەش ملیۆن لە دانیشتوانی هەرێم تەنها دەنگی یەك ملیۆنیان بەدەستهێناوە".

     

    سەرۆکى جوڵانەوەى نەوەى نوێ دەشڵێت، "ئەو دوو حزبە نوێنەرایەتی و بڕیاری كوردستانیان لە بەغدا لە ڕێگەی كۆمسیۆنێكەوە و بەهاوكاری حزبە شیعییەكان قۆرخكردووە، ئێستا كاتی ئەوە هاتووە ئەو هاوكێشەیە بگۆڕدرێت و بەغدا لەگەڵ نوینەرانی ڕاستەقینەی گەلی كورددا مامەڵە بكات".

    ئەم هەڵوێستەی شاسوار عەبدولواحید لەکاتێکدایە، دوێنێ، سێ سەرۆکایەتییەکەی هەرێم لەبارەگای سەرۆکایەتی هەرێم کە پارتی سەرۆکایەتی دەکات لەگەڵ نوێنەری لایەنەکان جگە لە نەوەی نوێ کۆبوونەوە و تیایدا رایانگەیاند، "ئه‌و هه‌نگاوانه‌ى تا ئێستا له‌لايه‌ن به‌ڕێز عه‌للاوييه‌وه‌ نراون بۆ زۆرێك له لايه‌ن و پێكهاته‌كانى گه‌لى عێراق جێگه‌ى دڵنيايى و متمانه‌ نين، بۆيه‌ داوا ده‌كه‌ين پێويسته‌ پێداچوونه‌وه‌ به‌ شێوازى كار و به‌رنامه‌كه‌يدا بكرێته‌وه‌ به‌ جۆرێك كه‌ حكومه‌تى ئاينده‌ داخوازيى هه‌موو پێكهاته‌كانى عێراق، بهێنێته‌ دى".


زۆرترین خوێندراو